Мон ивортэк ыши та войнаын...

Вождэ эн вай, кошки мон войнае,
Анай, пал кыл но вератэк кошки.
Ӧй берта, ӧй но ӟыгырты тонэ,
Уд лэзьы шуыса, угось, тодӥ.
Мукет сямен ӧй быгаты, анай,
Мон сьӧлыктэм лулъёс понна быри.
Тушмонъёсыз мон сюрсъёсын «турнай»,
Трос эшъёсме но кулонлэсь ути.
Но утьыны ӧй быгаты асме,
Мон ивортэк ыши мурт дуннеын.
Анай, туж курисько, жаля астэ,
Но ул кема югыт дунне вылын.
Нош мон тынад юг кылчинэд луо,
Бордад ыркыт тӧлэн шыпак йӧтско,
Бам вылысьтыд синвуостэ ӵушо,
Пурысь йырсиостэ маялляло.
Шунды сиен пыро коркаямы,
Гужем сяськаяло бакчаямы,
Сизьыл куарен пельпум вылад пуксё,
Тулыс зорен куректондэ гылто.
Анай, туж зол эн чигы сюлэмдэ,
Мыным татын ӧвӧл ни вӧсь - капчи.
Эн тышкаськы кылзӥськисьтэм пидэ,
Улон сюрес кылдэм мыным вакчи.
Тон ялан возьмалод, мон тодӥсько,
Уз оскы сюлэмыд ӧвӧлэлы.
Тынад малпанъёсад мон улӥсько,
Тон котыртӥ берга каръян лулы...
Нош мугоры кылле мурт дуннеын,
Мон ивортэк ыши та войнаын...
Лилия Рыбакова