Чоныштемже ломбо укш

Йӧратет, палем мый, шошым,
Чевергалше садернам.
Пеледалтше ломбо укшым,
Пушшым тамлаш, пуэнам.
Каван канде яндар тӱсшым
Шерем теммеш ончынем.
Шоптыр гае шем шинчатшым
Тачат ашнем ушыштем.
Рвезе пагыт пуйто лийын.
Палаш ыле, куш каен?
Илыш корным, ший ден пидын,
Ошкеденат весе ден.
Ош тӱняште кажныланна
Уло келшыше пелаш.
Муаш неле пӱрымашым,
Ок логал вигак шинчаш.
Шошынаже вараш кодын.
Ломбо омарта шога.
Кечыйол, воктенже модын,
Лекше укшым шымата.