ИЛҺАМЧЫЛАР

Эшкә уңган, мәхәббәттә назлы,
Телгә үткен татар кызлары!
Бары сезне генә яратабыз,
Сезгә багышлыйбыз җырларны!
Сөйкемле һәм сөеклеләребез,
Зәңгәр, кара, яшькелт күзлеләр,
Кара, саргылт, коңгырт чәчлеләр һәм
Сыгылмалы нечкә биллеләр.
Халкыбызны дәвам итүче сез,
Ямь бирүче усал дөньяга,
Шыксыз көзләр яздай күренәләр,
Сез безгә елмаеп торганда!
Сездән башка Җирдә мәхәббәт юк,
Гүзәллек юк фани дөньяда,
Сезне генә илһамчылар итеп
Санаган бит бөек Тукай да!
Хафиз Галиев