***

Энмам куртэм пеӆа
па си нопсэм керӆас.
Ата йиӆ, куш хатӆа –
самем ант маӆ кум.
Матты ӆыпем хося
таям юрэм хоӆас.
Тутэн иты, хота
хурӆатаӆн лумӆ.
Хорңаӆӆаям яӆпа,
хота опсас куртэм.
Хасям хот воӆаӆна
ин ӆув кунярӆыйӆ.
Ёхаттыя тохи,
хота унтэм – уртэм
Ӆаськам лумаӆ хося
сясяӆ тураӆ сыйӆ.
Опсэматы яӆпа
някман паӆшак саңхма.
Си паӆ лотэн эӆты
умасьтыя Ас.
Хота ноптаӆмемна
тыеӆ-тохеӆ яңхсам.
Маӆасысэм хоӆпемн
йиңкем тайты тасьӆ.
Ёхаттыя похла
ӆойты хуӆӆам пуңӆа.
Утаң понӆаӆ иӆпийн
ӆыӆңаӆматы рат.
Каман пуш си хуӆӆам,
шавиӆысэӆ куртэм
Кев вот машак эӆты
хатӆаӆна па атн.
Хусьӆаям ма тутэм
ӆэсьтантыты няӆмаӆ.
Куртэм шитамаӆа
рахантыты Ӆыӆ.
Хуӆаттыя сита
ванаматы каӆмаӆ.
Хун ӆув Мощнэ иты
тутэн пуңӆа йиӆ.
Ӆэтэм-йинсьтэм эӆты
сяӆта потар туты
Куртэм хося уӆам
Ёхем-ӆухсэм пиӆн.
Яммаӆтыя ӆыпем,
матты сюняң ирн…
Энмам мувем йисаӆ
матты ӆоңаӆсаӆӆы.
Ма эваӆтэм оӆмем
тэӆна усӆы нох.
Катӆасыям еңкаӆ
ситы тэрматӆаӆӆы
Тови сысна Асэн
ёхаттаӆна сохӆ.
Хойна вантса:
уӆты
Па сирн, таңха, самем
Ӆаськам мувем хося
век ант хошаӆ ӆув.
Ант ки шияӆыӆӆы
энмам мувем – аңкем.
Матты шепамтыӆӆы
си сыс эсам шувӆ.
Эсам шуваӆ, таңха,
хув ант пулэмиман.
Няврэм иты, па си
кум ант тайӆам ма.
Тэрматӆаям яӆпа,
вой кемн пурӆэмиӆам.
Тэкнаптаты ӆыпем
энмам мувемна…
Роман Ругин