АҠЫЛ ҺӘМ МӘКЕР (мәҫәл)

Көс һынаша Мәкер менән Аҡыл..
Туҡтап торғандар хәл алырға,
Әйткән Мәкер :*Һис тә мин бирешмәм
Һиңә , зирәк уйлы Аҡылға,
Мин еңелмәм, ә һин еңелерһең,
Аҡыл да бар миндә, хәйлә лә,
Батырлыҡ һәм саялыҡ та көслө,
Һөйкөмлөлөк тә бар үҙемдә.
Һәр нәмәне бик тиҙ эшләп ҡуям,
Күҙ эйәрмәғҫ йәшен тиҙлектә,
Көрәшмә һин Аҡыл минең менән,
Мин бит - Мәкер! Ултыр һин биктә!*
Яуап бирҙе Аҡыл: *Күрәһең бит
Ғәҙеллекте яҡлап сыҡҡанмын,
Мәкерҙе көрәштә еңер өсөн
Алдарыңа килеп баҫҡанмын.
Еңелмәм мин! Минең холҡома ла
Батырлыҡ та, саялыҡ та хас,
Яйлап эш итеү ҙә, сабырлыҡ та,
Халыҡ яҡлауы ла бирә көс!
Иң мөһиме, - тип Мәкергә Аҡыл
Дауам итте яуапҡа һүҙен,
- Һис тә ҡурҡмайынса дөрөҫ әйтеп
Ғәҙеллеккә барам мин үҙем.*
Мәкер менән Аҡыл һүҙ алышҡас,
Тағы дауам итте көрәште,
Ҡарап торған халыҡ *Ғәҙеллек! *тип
Өҫтәй аҡылға көс -ғәйрәтте.
Кешелек яралған саҡтан алып
Мәкер менән Аҡыл көрәшә,
Мин дә теләп ҡалам бар йөрәктән
Аҡыл еңһен ошо көрәштә.
Фәүзиә Ҡотлогилдина -Алтынбикә