"НАНҶӮН"

Нанҷӯн туят ца тойд,му хӯна хинур зибуд,
Цӯнд солаоюм вуз ту авен аз ху пиц фируд,
Ар го кинум ту ёд,цирафцумта вуз ту ҷат,
Бахих ки мурд а НАН ту хезандиюм навуд.
Солен тийенат Нанта ринухчак ачаф насӯд,
Наник ди тойд йата вируғҷак ачаф насӯд,
Якборга йи армӯн, ту хоктир ху кал рибим,
Дар фикрэ тута кам, му сузах ачаф насӯд.
Мам зиндагияндам фукафик дар ба дар а НАН,
Мардуми ғэл дарун фукафам бехабар а НАН,
Цӯндам ту хезанди ца вад беғамафам вад,
Нур тар ди ту хок хез фукафик бесамар а НАН.
Нанҷӯн ту авенум аҷабик хор ца судж вуз,
Нанҷӯн ту авенум аҷабик зор ца судж вуз,
Якбори ту худм вуз ца винум софта хазӯн сам,
Нанҷӯн ту авенум аҷаб бемор ца судж вуз.
Қадамта ху умранд наринест аз ту а НАНҶӮН,
Бе туяф фукаф гахт замӯнага хабистон,
Аргота лалайик ца хинум,аз тута ёдум,
Тут йивикафик дӯнд а НАНҶӮН му армӯн.
( Қадам. 2 .07.2016)