@@@

დრო შემიჩერეთ, ჩემ წარსულში მინდა დავბრუნდე,
ამ ცხოვრებაში ბევრი რამე მინდა შევცვალო,
დრო შემიჩერეთ, სულ ცოტა ხნით მინდა გავბრუვდე,
მხრებზე შემოდგმულ მძიმე უღელს გამოვეცალო.
გაცრეცილ წიგნად შემოვრჩები ამ წუთისოფელს
და თუ გადამშლით, ფურცლები არ დამიზიანოთ,
ყველა აბზაცი გულის წამლად გამოვიზოგე,
უფლის კარამდე მისვლა რომ არ დავაგვიანო.
ბევრი შეცდომა, ღალატი და მტრობა კაცთაგან,
სულ საზეპირო აბზაცებად ამოვინიშნე,
ბევრსაც წერტილი დავუსვი და ბევრმაც დამკარგა,
ბევრისგან გულში ჩადებული შურიც ვიწვნიე.
გამოვიარე გაკვეთილი უმაგალითო,
მხოლოდ ბავშვობის წლები შემრჩა სუფთა, ფაქიზი,
დრო შემიჩერეთ, ტკივილს თავი გამოვარიდო,
ეს მხოლოდ ჩემმა გულმა იცის თუ რას განვიცდი.
დრო შემიჩერეთ, ფიქრი სულში დაეხეტება,
ვერ გავექცევი ჩემდა წილად მიწას აზომილს,
გული თუ ხარობს, არასოდეს დამიბერდება,
მინდა მოვასწრო, დავაბრუნო დროის წამზომი.
გულდაწყვეტილი გადავხედავ გამოვლილ ბილიკს,
ეკალ - ბარდები შიშველ ფეხით გამითელია,
ვეძებ სარკეში ჩემ სახეზე დაკარგულ ღიმილს,
ვინ მოსთვლის, ცრემლში რამდენი წელი გამილევია.
დრო შემიჩერეთ, ვერ მოვასწრო სათქმელი იქნებ,
სულში ვიხორცებ ყველა ტკივილს ცრემლებად ნამსხვრევს,
უიარაღოდ ვებრძოლები გულს ნაწოლ ფიქრებს,
წლები არ ითმენს, დრო მჯობნის და მუხლებში მამსხვრევს.
დრო შემიჩერეთ, გევედრებით, რას ვითხოვ ამდენს,
ბავშვობის წლები დამიბრუნე ღმერთო, მაღალო.