УЗИЛМАС РИШТА

Миллион йиллик қўрғонларни бузган билан,
Фисқу фасод гирдобида сузган билан,
Бир кун ўзига келар, чоҳ қазган билан—
Қариндош у, қариндош у, қариндош у.
Томирида равон оқиб турар қонинг,
Насл-насаб ажратишга йўқ имконинг,
Юзин бурса ҳамки, ачиб турар жонинг,
Қариндош у, қариндош у, қариндош у.
Имон тилаб, инсоф тилаб умринг ўтар,
Юз йил яшашга ёнида қурбинг етар,
Қадрсизман, дема, бир кун қадринг ўтар—
Қариндош у, қариндош у, қариндош у.
Чуқур кирма "душман" ингнинг ботқоғига,
Кўп куйинма туриш-турмуш, ётмоғига,
Умид қилгил, яраш тонги отмоғига—
Қариндош у, қариндош у, қариндош у.
Ёвқарашлар, ётқарашлар топар барҳам,
Жон-жонига оро кирмас олтин, дирҳам,
Бошга мушкул тушганида керак маҳрам,
Қариндош-у, қариндош-у, қариндош-у.
Не-не қариндошлар унда мангу маҳкум,
Қисматларни тарозида тортмоқ муҳим.
То қиёмат, тақдири бир, бир тан-жон ким?—
Қариндош- у, қариндош-у, қариндош- у.