Кугече годым пелештыме мут
А, йӧратен лийын шого, Кугече кугу юмо, порсын лӱҥгалтышет дене, илышым ылыжтыме кечет дене.
Кугече Кугу юмо! Ош ӱстембалшовычым шаралтен, тичмаш шорвам шынден, тичмаш пура коркат дене, тичмаш кинде сукыр, эгерче, туарат дене, пыреман кум тӱрлӧ когылет дене, тичмаш мунет дене, саска сортат дене йӧратен лий. Тичмаш чесна дене аралтышым, серлагышым, перкем йодына, ашеш кайже!
Сурт юмо, Кугече кугу юмо дене ик ой каҥашан лийын шого. Клат кӧргӧ кинде перкет дене, тӱрлӧ тӱсан оксат дене йывыртыктен шого, алал лийже! Сурт печымат осал тӱтан мардеж деч аралтышым ыште. Осал сыҥсалык дечат аралтышым ыштен шого. Ваш-ваш лавыра шомакым кышкыме деч, пычалтар шикш деч арален, серлагышым пуэн шого. Ий гыч ийыш, арня гыч арняшке ака-шӱжар дене, иза-шольо дене, тӱрлӧ йылме калык дене келшен илаш серлаген шого.
Кугече Куго Юмо, аралтышым, серлагышым,
перкем йодын кумалына, ашеш кайже.
Поро Ош Кугу Юмо, таче эр кынелын, яндар вӱд дене кап-кылым мушкын шӱалтен, яндар вургемым чиен, ший сорта, ший окса, кышыл мелна дене тӱрлӧ перкем йодын кумалына.
Ешлан, пошкудылан, марий калыклан, мландӱмбал калыклан тазалыкым, вий-куатым, поро, сай, тыныс илышым йодына.
Эрдене вӱта вольык йӱк дене кынелын, вӱта кӧргыш ончалын, вольыкым да кайыквусым пукшен-йӱктен, куанен илаш полшо.
Ош Кугу Юмо, вольык перкем, кайыквусо перкем, клат тич шурно перкем, вольыклан шудо перкем, кол перкем, мӱкш перкем йодын кумалына.
Поро Ош Кугу Юмо, осал шӱлыш деч, осал шоныш деч, осал кӱзӧ-товар-пычал деч кораҥде, шинчавочмо деч, осалым шонен коштшо деч, локтызо, шудалше да каргыше деч арале.
Поро Ош Кугу Юмо, эр кече гай нӧлталтын, тылзе гай волгалтын, кеҥеж лай мардеж гай шыман ойласен, ший гай йылгыжын, умыла гай оварген, порсын шӱртӧ гай шуйнен ярымалтын илаш пуйыро.
Ош Кугу Юмо, Тыйын йӱлатым шуктен, Тыйым йӧратен илаш полшо. Мом йодын кумалына гынат, кумалтышнам кавыл ыштен нал.
Комментарии 7